05 މެއި 2018
"ޒިންމާދާރު މީޑިއާ" ބައްދަލުވުން ލ. ގަމުގައި ފަށައިފި
"ޒިންމާދާރު މީޑިއާ" ގެ ނަމުގައި ބައްދަލުވުމެއް ލ. ގަމުގައި ފަށައިފިއެވެ. މިނިސްޓްރީ އޮފް ހޯމްއެފެއާޒުން އިންތިޒާމްކޮށްގެން އެއްދުވަހުގެ މުއްދަތަށް ކުރިއަށް ގެންދާ މިވޯކްޝޮޕް އިފްތިތާޙްކޮށްދެއްވީ ޑެޕިއުޓި މިނިސްޓަރ މޫސާ ފަތުހީއެވެ.
 
18 އޭޕްރީލް 2018
ޝަހީދުންގެ ދުވަހުގެ ރަސްމީ ޖަލްސާ ބާއްވައިފި
މިއަހަރުގެ ޝަހީދުންގެ ދުވަހުގެ ރަސްމީ ޖަލްސާ ރޭ އިސްލާމީ މަރުކަޒު މައިދާނުގައި ބާއްވައިފިއެވެ. މިޖަލްސާ ޝަރަފްވެރި ކޮށްދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރީޓީ އާދަމް ޝަރީފް ޢުމަރުއެވެ. މިޖަލްސާގައި ޝަރަފުވެރި މެހްމާން އާދަމް ޝަރީފް ޢުމަރު ދެއްކެވި ވާހަކަފުޅުގައި އެކެއް ފެބްރުއަރީގެ ހާދިސާއާއި އަލިރަސްގެފާނު ޝަހީދުކޮށްލި ހާދިސާއާ މާބޮޑު ތަފާތެއްނެތް ކަން ފާހަގަކުރައްވާ، ރާއްޖޭގެ މިނިވަންކަމާއި އިސްތިޤްލާލު ގެއްލެންދަނިކޮށް ރައީސުލްޖުމްހޫރިއްޔާގެ ޙިކުމަތުޢަމަލީގެ ސަބަބުން ޤައުމު ސަލާމާތްކުރެއްވުމަށް އެމަނިކުފާނު މަސައްކަތް ކުރެއްވީ، އިންޑިޔާގެ މިނިވަންކަމުގެ ބާނީ މަހާތުމާ ގާންދީ މަސައްކަތް ކުރެއްވިގޮތަށް ކަމަށް ވިދާޅުވިއެވެ.
 
15 އޭޕްރީލް 2018
ކުޅުދުއްފުށީ ލޯކަލް މާރުކޭޓުގެ މަސައްކަތް ނިމިފައިވާތީ އެތަނުގެ އިންސްޕެކްޝަން ކުރުމުގެ ދަތުރެއް ކޮށްފި
ހދ. ކުޅުދުއްފުށީ ލޯކަލް މާރުކޭޓު އިމާރާތްކުރުމުގެ މަސައްކަތް ނިމިފައިވާތީ އެތަނުގެ އެންމެ ފަހުގެ އިންސްޕެކްޝަން ހަދައި ކުޅުދުއްފުށީ ކައުންސިލާއި ހަވާލުކުރުމުގެ ގޮތުން މިމަހުގެ 12 އިން 15 އަށް މިނިސްޓްރީ އޮފް ހޯމްއެފެއާޒުގެ ޓީމެއް ކުޅުދުއްފުއްޓަށް ދަތުރެއްކޮށްފިއެވެ.
 
15 އޭޕްރީލް 2018
ޝަހީދުންގެ ދުވަހުގެ ރަސްމީ ޖަލްސާ އޮންނާނީ އިސްލާމީ މަރުކަޒު މައިދާނުގައި
މިއަހަރުގެ ޝަހީދުންގެ ދުވަހުގެ ރަސްމީ ޖަލްސާ އޮންނާނީ މިމަހުގެ 17 ވާ އަންގާރަ ދުވަހުގެރޭ އިސްލާމީ މަރުކަޒު މައިދާނުގައެވެ. މިޖަލްސާ ޝަރަފްވެރި ކޮށްދެއްވާނީ ނާއިބު ރައީސް އަލްފާޟިލް ޢަބުދުﷲ ޖިހާދުއެވެ. ޖަލްސާގައި ޝަރަފުވެރި މެހުމާނުގެ އިތުރުން މިނިސްޓަރ އޮފް ހޯމްއެފެއާޒް އަޒްލީން އަޙްމަދު ވާހަކަފުޅުދައްކަވާނެއެވެ.
 
12 އޭޕްރީލް 2018
"ޖުމްހޫރީ ފަންސާސް، ހުރަވީ ބަހުސް" ގެ ނަމުގައި ބަހުސެއް ބާއްވައިފި
މިއަހަރަކީ ދިވެހި ޖުމްހޫރިއްޔަތަށް ފަންސާސް އަހަރުފުރޭ އަހަރު ކަމަށްވާތީ، ޖުމްހޫރީ ފަންސާހާއި ގުޅުވައިގެން މިއަހަރުގެ ހުރަވީ ދުވަހުގެ މުނާސަބަތުގައި ބޭއްވުމަށް ހަމަޖެއްސި "ޖުމްހޫރީ ފަންސާސް، ހުރަވީ ބަހުސް" ރޭ ބާއްވައިފިއެވެ.